Министр Алымкадыр Бейшеналиев жарандарга кайрылды

Саламаттык сактоо министри Алымкадыр Бейшеналиев жарандарга кайрылып, сасык тумоону өз алдынча дарылабоого чакырды.

Анда министр өлкөдө Үй-бүлөлүк медицина борборлору штаттык режимде иштеп жатканын, дем алыш күндөрү да нөөмөт уюштурулганын белгилеген.

"Курч респиратордук вирустук инфекциялар (КРВИ), сасык тумоо жана башка жугуштуу оорулардын сезондук өсүшүнө байланыштуу Саламаттык сактоо министрлиги өзүңүздүн жана балдарыңыздын ден соолугуна өзгөчө көңүл бурууга чакырат.

Оорунун биринчи белгилери, мисалы, дене таптын көтөрүлүшү, жөтөл, мурундун агышы же алсыздык пайда болгондо, өз алдынча дарыланбаңыз, квалификациялуу медициналык жардам алуу үчүн дароо үй-бүлөлүк медицина борборлоруна кайрылыңыз.

Республика боюнча Үй-бүлөлүк медицина борборлору штаттык режимде иштеп, дем алыш күндөрү нөөмөт уюштурулду. Республикада КРВИ жана сасык тумоо боюнча эпидемиологиялык абал туруктуу экенин белгилегим келет. Саламаттык сактоо министрлиги абалды такай көзөмөлдөп, саламаттыкты сактоо уюмдарында мониторинг жүргүзүүдө" деп айтылат кайрылууда.

Ошондой эле министр жарандарды алдын алуу чараларын көрүүгө үндөп, санитардык эрежелерди сактоого чакырган:

• жайларды үзгүлтүксүз желдетип туруу;
• колду самын менен жуу;
• эл көп топтолгон жерлерге барганда беткап кийүүнү унутпаңыз;
• туура тамактануу жана активдүү жашоо образын жүргүзүү менен иммундук системаны бекемдөө.