Чатырдагы муз өмүргө кооптуу. ӨКМ коопсуздук эрежелерин эскертти

Кыш мезгилинде жана эрте жазда абанын температурасы кескин түрдө жогорулап, кайра төмөндөгөндө дарактардын бутагында, жарнама калкандарда, имараттардын чатырларында салаңдаган муздар пайда болгонун көрүп жүрөбүз. Бул көрүнүшкө чоңдор көп көңүл бурбай шаша-буша жол уласа, кичинекей балдар аны түшүрүп ойногонго кызыгышат. Катуу жана учтуу муз кокустан түшүп кетсе, адам өмүрүнө коркунуч жаратарын эстен чыгарбоо зарыл. Буга байланыштуу Өзгөчө кырдаалдар министрлиги төмөнкү эрежелерди эске алууну сунуштайт:

Көп кабаттуу имараттардын, турак үйлөрдүн чатырында пайда болгон муздар эң көп кооптуулук жаратат. Андыктан жол жээгинде бара жатканда имараттын дубалына жакын баспаңыз;
Чатырдын карнизинин астына турбаңыз;
Балдарды ал муздарды сындырып ойногонуна жол бербеңиз;
Сыртка чыгып жатканда үйүңүздүн, имараттын чатырына чогулган кардын көлөмүнө көңүл буруңуз;
Жол өтмөктөрүнөн бара жатканда чатырдан кандайдыр бир дабыштарды уксаңыз, маани бериңиз. Бул учурда чатырга топтолгон кар массасы же тоңгон муз түшүшү мүмкүн;
Кулакчаны тагынып алып жолдо баспаңыз. Жерди эле эмес, өйдө жакты да карап, айланыңызга көңүл буруңуз;
Унааны жана баланын коляскасын имараттын дубалына, балконго жакын койбоңуз.