Түндө Чүйдөгү сарайда бир адам бычакталды. Милиция 59 жаштагы жаранды кармады

Жайыл районунда кишини бычактоого шектелип 59 жаштагы жаран кармалды. Бул тууралуу Чүй облустук ички иштер башкармалыгы билдирди.

Маалыматка ылайык, кечээ, 16-январда милицияга Жайыл райондук ооруканасынан 45 жаштагы жаран бычактан алган жаракатынан улам жандандыруу бөлүмүнө жаткырылганын кабарлаган. Факты каттоого алынып, Кылмыш-жаза кодексинин 130-беренесинин (Ден соолукка оор залал келтирүү) негизинде кылмыш иши козголгон. Шектүү катары 59 жаштагы жаран кармалып, убактылуу кармоочу жайга киргизилген.

Тергөөдө алар 16-январь күнү түндө Кара-Суу айылында жайгашкан сарайда спирт ичимдиктерин ичишкени, ортолорунда түшүнбөстүк жаралып чырга айланганы, натыйжада шектүү жабырлануучуну ашкана бычагы менен көкүрөк тушка сайганы аныкталган.

Милиция иш боюнча бардык зарыл болгон соттук-медициналык экспертизалар дайындалып, тергөө иштери жүрүп жатканын кошумчалады.

Автор: Кылымбек Бейшеев
Фото: Чүй ОИИБ