Таласта катуу шамал мектептин чатырын учуруп кетти

Бүгүн, 22-январда Таласта катуу шамал болуп, мектептердин биринин чатырын учуруп кетти. Бул тууралуу ӨКМдин басма сөз кызматы билдирди.

Маалыматка ылайык, Таластын Айтматов районуна караштуу Жоон-Дөбө айылында ылдамдыгы секундасына 25-30 метрге жеткен катуу шамал катталып, Осмонов атындагы орто мектептин чатырын учуруп кеткен.

"Айтматов райондук Жарандык коргонуу комиссиясынын өкүлдөрү жеринде болуп, тиешелүү иш-чараларды жүргүзүүдө жана кырсыктын кесепетинен келтирилген чыгымдар такталууда", - деп билдирди ӨКМ.

Кырсыктан жабыр тарткандар катталган эмес.

Автор: Бурул Турусбекова
Фото: ӨКМ