Жаңы унааны эски кылып көрсөткөн. УКМК Оштогу бажычыны кармады

Ош мамлекеттик бажы кызматында бажы төлөмдөрүн азайткан коррупциялык схема аныкталды. Бул тууралуу Улуттук коопсуздук мамлекеттик комитети билдирди.

Маалыматка ылайык, былтыр 5-июлда "Бими Ош Сервис" бажылык тариздөө жеринин Ж.Т. аттуу бажы кызматкери иш жүзүндө 2018-жылы чыгарылган Toyota Prado үлгүсүндөгү унааны 2005-жылкы кылып акты түзүп берген. Мындан улам бюджетке бажы төлөмү катары 438 миң 114 сом гана төлөнгөн. Бирок унаанын ээси бажы төлөмү катары 1 миллион 497 миң 576 сом төлөшү керек болгон. Демек, мамлекетке 1 миллион 59 миң 462,13 сом зыян келтирилген.

Атайын кызмат бажычыга Кылмыш-жаза кодексинин 337-беренесинин 3-бөлүгү боюнча айып тагылып, сот тарабынан камакка алынганын кошумчалады.

Автор: Кылымбек Бейшеев
Фото: УКМК