Кара-Балтада 18 жаштагы жигит алдамчылыкка шектелип кармалды

Жайыл районунда жасалма төлөм чектерин колдонуп, алдамчылык кылууга шектүү жаран кармалды. Бул тууралуу 25-январда Чүй облустук милициясы билдирди.

Маалыматка ылайык, 25-декабрда Жайыл райондук ички иштер бөлүмүнө район тургуну арыз менен кайрылган. Ал 12-декабрдан 22-декабрга чейин белгисиз адамдар Кара-Балта шаарында жайгашкан "Пиццбур" кафесинен тамак-аш жеткирүүгө буюртма берип, Мбанк мобилдик тиркемесинин жасалма төлөм чектери менен бир нече жолу тамак-аш алышып, натыйжада жалпы суммасы 44 миң 835 сом зыян келтирилгенин билдирип, мыйзам чегинде чара көрүүнү өтүнгөн.

Бул факт боюнча Кылмыш-жаза кодексинин 209-беренесинин (Алдамчылык) негизинде кылмыш иши козголгон. Ыкчам-иликтөө иш-чараларынын жүрүшүндө, 2006-жылы туулган Э.Э. аттуу шектүү кармалып, тергөө абагына киргизилди.

Учурда шектүүнүн ушул сыяктуу кылмыштарга катыштыгы бар же жок экендиги текшерүүгө алынып, тергөө иштери уланууда.

Автор: Бек Оморбеков
Фото: Чүй ОИИБ