Быйыл Баткенге үч стадион курулат

Кыргыз футбол биримдигинин башкы катчысы Медербек Сыдыков жана КФБнын президентинин кеңешчиси Аманбек Каскеримов иш сапары менен Баткен облусуна барып, облуста курула турган стадиондордо иштердин жүрүшү менен таанышышып, Баткен, Кызыл-Кыя, Раззаков шаарларынын мэрлери жана курулуш иштерине тиешелүү уюмдардын адистери менен жумушчу жыйын өткөрдү. Бул тууралуу Кыргыз футбол биримдиги кабарлады.

Белгилей кетсек, 2025-жылы 20га жакын футбол объекттинин курулушу жана реконструкциясы пландалууда. Анын ичинде Баткен облусунда Баткен, Кызыл-Кыя, Раззаков шаарларынын үч стадионунун курулушу пландалууда.

Жолугушуунун алкагында курулуш иштери, графиктер, каржылоо, логистиканы жакшыртуу жана долбоорлорду ишке ашыруунун бардык этаптарында көзөмөлдү камсыз кылуу маселелери көтөрүлдү.

Иш-сапардын дагы бир бөлүгү болуп, жергиликтүү клубдардын машыктыруучулары менен болгон жолугушуу болду. Анда клуб өкүлдөрү жана машыктыруучулар менен 2025-жылкы футбол сезонуна болгон даярдыктар, жаңы форматтар, анын ичинде 2026-жылкы сезонго Премьер-Лигага жергиликтүү клубдарын даярдоо боюнча маселелер каралды.