Швецияда Куран китебин өрттөгөн акциялардын уюштуруучусу өлтүрүлдү

Швецияда Куран китебин өрттөгөн акциялардын уюштуруучуларынын бири өлтүрүлгөнүн SVT телеканалы билдирди.

Маалыматка караганда, кечээ, 29-январда Стокгольмдун түштүгүндө октон жараат алган 38 жаштагы киши табылган. Ал Куран китептерин өрттөп келген Салван Момика болгон жана алган жараатынан улам каза тапкан.

Телеканал бүгүн Стокгольмдун соту "Улуттук белгидеги кастыкты козуткан" деген айып боюнча өкүм чыгарылмактыгын, бирок айыпталуучулардын бири каза болгону тастыкталгандыктан отурум кийинкиге жылдырылганын кабарлады.

SVT шектүү делген бир нече адам кармалганын, кылмыш болгон жердин айланасы курчоого алынганын маалымдаганы менен, полиция окуя жана маркумдун өздүгү боюнча расмий маалымат бере элек.

Белгилей кетсек, Швецияда Куран китебин өрттөгөн акция бир нече ирет уюштурулган, аны ишке ашыргандардын бири каза тапкан теги ирактык Момика болгон. 2023-жылы жайында Стокгольмдун 4 жеринде мусулмандардын ыйык китебинин өрттөлүшү боюнча прокуратура ага карата "Улуттук белгидеги кастыкты козуткан" деген айып таккан.

Автор: Кылымбек Бейшеев
Фото: Иллюстрациялык сүрөт