"Долларлар чачылып". УКМК Ошто Эсеп палатасынын инспекторун кармады (фото)

Эсеп палатасынын башкы мамлекеттик инспектору 5000 доллар пара алып жаткан жеринен кармалды. Бул тууралуу УКМК кабарлады.

УКМКнын маалыматына ылайык, бүгүн, 1-февралда козголгон кылмыш ишинин алкагында 5000 доллар өлчөмүндө пара талап кылуу фактысы боюнча Эсептөө палатасынын Т.А.А. аттуу инспектору көрсөтүлгөн сумманы алуу учурунда кармалган.

"2024-жылдын 6-декабрынан азыркы учурга чейинки мезгилде Эсеп палатасынын инспекторлору тарабынан Ош шаарынын мэриясынын бөлүмдөрүнүн финансы-чарбалык ишмердүүлүгүнө текшерүү жүргүзүлдү.

Мындан улам, Эсеп палатасынын инспекторлор тобунун жетекчиси Т.А.А. Ош шаардык мэриясынын түзүмдүк бөлүмдөрүнүн биринде текшерүүнүн мөөнөтүн негизсиз создуктуруп, укукка каршы иш-аракеттер аркылуу, текшерүүнүн жыйынтыгы боюнча оң чечим чыгаруу максатында 5000 доллар өлчөмүндө акча каражатын опузалап талап кылган", - деп билдиришти УКМКдан.

Кармалган жаран УКМКнын убактылуу кармоочу жайына киргизилип, тергөө-ыкчам иш-чаралары улантылууда.

Автор: Азат Бейшенбеков