"Бишкекте 70 сомго чыкты". Картошканы убактылуу экспорттоого тыюу салуу каралууда

Картошканы убактылуу чет жакка экспорттоого тыюу салуу каралууда. Бул тууралуу Суу ресурстары, айыл чарба жана кайра иштетүү өнөр жай министрлиги билдиришти.

Маалыматка ылайык, 1-февралда айыл чарба министри Бакыт Төрөбаев өлкөдөгү азык-түлүктүн баасына байланыштуу кеңешме өткөргөн. Анда ал тийиштүү органдарга азык-түлүктүн баасын тыкыр көзөмөлгө алууну тапшырган.

"Социалдык мааниге ээ азык-түлүктөргө болгон баанын негизсиз жогорулашын алдын алуу жана бааны туруктуу кармоо максатында картошканы экспорттоого убактылуу чектөө киргизүү маселеси каралып жатат", - деп жазылат маалыматта.

Буга чейин SUPER.KG порталына окурмандар Бишкек шаарынын борборунда картошканын килограммы 65-70 сомдон сатылып жатканын кабарлаган. Ал эми айрым соодагерлер муну картошка Казакстан менен Өзбекстанга ташылып жатканы менен түшүндүргөн.

Автор: Бурул Турусбекова