Таласта издөө жарыяланган жаран 10 жылдан кийин Бишкектен кармалды

Бишкек шаарында 10 жылдан бери издөөдө жүргөн жаран кармалды. Бул тууралуу Талас облустук ички иштер башкармалыгынан билдиришти.

Маалыматка ылайык, шектүү делген 43 жаштагы жаран 2013-жылдын август айында Манас районунун 42 жаштагы тургунунун Mercedes-Benz 230 үлгүсүндөгү унаасын 8 миң долларга баалап алып, бирок акчаны бербей качып кеткен. Бул окуя боюнча 2015-жылы Кылмыш-жаза кодексинини "Алдамчылык" беренеси менен кылмыш иши козголгон.

Бирок шектүү тергөөгө келбей, изин жашырып жүргөндүгүнө байланыштуу 2015-жылдын ноябрь айында издөө иши башталган. Быйыл 1-февралда ал Бишкек шаарынан кармалып, Таласка жеткирилип, убактылуу кармоочу жайга киргизилген. Учурда тергөө иштери уланууда.

Автор: Кылымбек Бейшеев
Фото: Талас ОИИБ