Түндө унаага салып, белгисиз жакка алып барышкан. Бишкекте адам уурдоого шектүүлөр кармалды

Бишкек шаарында адам уурдаганга шек саналып 25 жана 28 жаштагы жарандар кармалды. Бул тууралуу бүгүн, 11-февралда шаардык милиция кабарлады.

Маалыматка ылайык, алар 27-январда болжол менен саат 21:30 чамасында Жал айылынан 17 жаштагы баланы Honda FIT үлгүсүндөгү унаага мажбурлап салышып, аны белгисиз тарапка алып барышкан жана ал жерден өспүрүмдүн денесине залал келтиришип, баасы 15 миң сомду түзгөн iPhone X үлгүсүндөгү телефонун тартып алышкан.

Бул факты боюнча Кылмыш-Жаза Кодексинин 165-беренеси (Адам уурдоо) менен кылмыш иши козголгон. Шектүүлөр кармалып, Ленин райондук сотунун чечими менен Бишкек шаарынын №1 тергөө абагына 2 айга камакка алынган. Бишкек милициясы шектүүлөрдөн жабырлануучуга таандык телефон жана жогоруда аталган унаа алынганын белгилеп, тергөө иштери жүрүп жатканын кошумчалады.

Автор: Кылымбек Бейшеев
Фото: Бишкек ШИИББ