Жүрөк хирургиясындагы өрт: Адылбек Касымалиев жеринде бир нече тапшырма берди

Министрлер кабинетинин төрагасы Адылбек Касымалиев өрттөн жабыркаган Жүрөк хирургиясы жана органдарды алмаштыруу илимий-изилдөө институтуна барды. Бул туурасында мекемеден кабарлашты.

Маалымдалгандай, Саламаттык сактоо министрлиги жана ӨКМ тарабынан маалымат берилди.

Адылбек Касымалиев бир нече тапшырмаларды берди:

- Ведомстволор аралык комиссия бир жуманын ичинде өрттүн себептери жөнүндө корутунду берсин;

- Жабыр тарткандарды толук көлөмдө зарыл болгон дарылоо, реабилитациялоо жана психологиялык колдоо менен камсыз кылсын;

- Институтту калыбына келтирүү жана жабыр тарткандарга жардам көрсөтүү үчүн зарыл финансылык каражаттарды бөлүү жөнүндө маселени ыкчам карасын.

- ӨКМ пландан тышкаркы текшерүүлөрдү жүргүзсүн;

- Курулуш, архитектура жана турак жай-коммуналдык чарба министрлиги 7 күндүн ичинде имараттын техникалык абалы жана аны калыбына келтирүү мүмкүндүгү жөнүндө корутунду берсин.

Белгилей кетсек, 11-февралда Бишкекте жайгашкан Улуттук кардиология жана терапия борборунун имаратында өрт чыккан. Ал түнкү саат 23:15те толук өчүрүлгөн.

Окуя болгон учурда аталган жайда жалпы 104 адам (50 бейтап, анын 19у бала, 32 багуучу жана 22 кызматкер) болгон. Ал жактан 31 бейтап жакынкы ооруканаларга жайгаштырылган:

12 бала Эне жана баланы коргоо улуттук борборуна которулду. Анда 12 энеге жана эки атага медициналык жардам көрсөтүлгөн;
2 бейтап Улуттук госпиталдын жандандыруу бөлүмүнө которулган;
Кардиология жана терапия улуттук борборуна 15 бейтап (8 чоң адам жана 7 бала) жайгаштырылган;
Операцияга чейинки 19 бейтап үйлөрүнө жөнөтүлгөн.

Кырсыктан эки адам каза болгону айтылган.

Автор: Замира Ниязбекова