ӨКМ Кара-Суудагы кооптуу аймактан канча үй-бүлө көчпөй жаткандыгын ачыктады

Ош облусунун Кара-Суу районунда жер көчкү коркунучу жогору болгон аймакта 37 үй-бүлө жашап келет. Бул тууралуу маалыматты ӨКМдин басма сөз кызматы билдирди.

Маалыматка ылайык, аталган үй-бүлөлөргө мамлекет тарабынан жер тилкелери бөлүнгөн.

"Мамлекет тарабынан жардамдар көрсөтүлүп, коопсуз жерге көчүү үчүн жер тилкелери берилгенине карабастан, өздөрүнүн жана жакындарынын өмүрүн тобокелге салып, жашоону улантууда. Аталган үй-бүлөлөрдүн ичинен экөө мамлекеттен ссуда алып, ал эми дагы 14ү мындай мүмкүнчүлүккө ээ. Мындан тышкары 34 жаранга жаңы жер тилкелери бөлүнгөн", - деп билдирди ӨКМ.

Ошондой эле министрлик жыл сайын жер көчкү коркунучу тууралуу эскертүүлөрдү берип, түшүндүрүү иштерин жүргүзүп келерин кошумчалады.

Автор: Бурул Турусбекова