Экс-депутат баш болгон коомдук бирикменин мүчөлөрү массалык башаламандык уюштурууга шектелип кармалышты (видео)

Өлкөдө массалык башаламандыктарды уюштурууга шектелгендер кармалды. Бул тууралуу бүгүн, 24-февралда Ички иштер министрлиги билдирди.

Маалыматка ылайык, "Кырк уруу жети дубан ынтымагы" коомдук бирикмесинин айрым мүчөлөрү массалык башаламандыкты даярдоого багытталган жолугушуларды байма-бай уюштуруп, жарандарды өлкөдөгү кырдаалды туруксуздаштырууну жана мүлктөрдү талкалоону көздөгөн акция, митингдерге чыгууга чакырып келишкен. Милиция алардын иш-аракеттери тууралуу былтыр 20-декабрда кабардар болгон. Факты боюнча Кылмыш-жаза кодексинин 278-беренеси (Зомбулук көрсөтүү менен коштолуучу массалык башаламандыктарды уюштуруу) менен кылмыш иши козголгон.

Бүгүн алардын жашаган даректеринде тинтүү иштери жүргүзүлүп, жыйынтыгында граната, чолок мылтыктар, тапанчалар, ок-дарылар, камуфляж кийимдери, атайын бет каптар, баңгизаттар, диний адабияттар, массалык башаламандыкты уюштуруу боюнча нускамалар, атылбоочу курал-жарактар, унаа номурлары, уюлдук телефондор, флэш-карталар жана башка буюмдар табылган.

Шектүү делген 1963-жылы туулган У.К., 1956-жылы туулган Ч.А., 1983-жылы туулган И.К., 1965-жылы туулган Н.К., 1969-жылы туулган И.Д., 1965-жылы туулган Т.Ж., 1967-жылы туулган О.И., 1979-жылы туулган И.Ж., 1975-жылы туулган А.К., 1968-жылы туулган У.К. жана 1961-жылы туулаган К.Б. атуу жарандар кармалып, убактылуу кармоочу жайга киргизилишкен.