Чүйдө жарандар айдоо жерине мыйзамсыз 9 үй куруп алганы аныкталды

Суу ресурстары, айыл чарба жана кайра иштетүү өнөр жайы министрлигине караштуу Жерди жана сууну көзөмөлдөө кызматы тарабынан Чүй облусундагы Кара-Жыгач айыл аймагынын №9 жана №10 контурунда жайгашкан айыл чарба багытындагы айдоо жери максатсыз пайдаланылып келгени аныкталды.

Министрликтен билдиргендей, аталган жерге белгисиз жарандар тарабынан 5 пайдубал, 9 үй жана 1 тиричилик имарат курулган, ошондой эле жол салуу максатында узуну 425 метр, туурасы 6 метрди түзгөн сугат айдоо жерине кум-шагыл төгүлгөнү аныкталды.

Текшерүүнүн жыйынтыгында жогоруда аталган белгисиз жарандардын аракеттеринде кылмыш белгилери болушу мүмкүн экендигине байланыштуу Кылмыш-жаза кодексинин 212-беренесинин (Бөтөн жер участогун өзүм билемдик менен ээлеп алуу жана максаттуу багытын бузуу менен айыл чарба багытындагы жерлерге өзүм билемдик менен курулуш куруу) негизинде жогоруда аталган участоктор боюнча материалдарды кароо жана тиешелүү процессуалдык чечим кабыл алуу үчүн Чүй ОИИБине өткөрүлүп берилди.

Автор: Бек Оморбеков
Фото: Айыл чарба министрлиги