АКШ Түштүк Кореяга учак конуучу кемесин жөнөттү

АКШнын USS Carl Vinson учак конуучу кемеси 2-мартта Түштүк Кореянын түштүк-чыгышындагы Пусан шаарындагы аскер-деңиз базасына келип токтоду. АКШнын учак конуучу кемеси Дональд Трамп январда президенттик кызматка киришкенден бери Түштүк Кореянын портуна биринчи жолу келип жатат.

Түштүк Кореянын деңиз флотунун билдирүүсүндө, визит АКШнын кеңейтилген бөгөт коюу боюнча “бузулгус” милдеттенмесинин бир бөлүгү жана Сеул-Вашингтон аскерий альянсынын Түндүк Кореядан келген коркунучтарга каршы турууга даярдыгынын демонстрациясы болуп саналат.

Башкарылуучу ракеталык крейсер "Принстон" жана башкарылуучу ракеталык эсминец "Стерретт" дагы 1-ташуучу сокку уруу тобунун курамында Пусанга келишти.

"Биздин Пусандагы болушубуз Корея Республикасы менен Америка Кошмо Штаттарынын ортосундагы бекем альянсты, ошондой эле биздин союздаштарыбыз менен бирге машыгууга жана иш алып барууга жөндөмдүү экенибизди ачык көрсөтүп турат", - деди топтун командири Майкл Восье.

Ал биргелешкен ар бир машыгуу союздаштардын өз ара аракетин бекемдей турганын баса белгиледи.

Автор: Бек Оморбеков