"Өтө кооптуу нерсе". Ким Чен Ындын карындашы АКШга эскертүү берди

Тышкы күчтөр Пхеньяндын эгемендүүлүгүн жана коопсуздугун коргоого болгон даярдыгын сынабашы керек. Бул тууралуу Түндүк Кореянын лидери Ким Чен Ындын карындашы, "Эмгек" партиясынын борбордук комитетинин бөлүм башчысынын орун басары Ким Ё Чжон билдиргенин чет элдик басылмалар жазышты.

"Душмандар биздин эркибизди жана мамлекеттин эгемендүүлүгүн, коопсуздук кызыкчылыктарын коргоо жөндөмдүүлүгүбүздү өздөрүнүн бардык арсеналын колдонуу менен сынабашы керек. Бул өтө кооптуу нерсе", - деген ал.

Ошондой эле Чжон АКШнын азыркы администрациясы өзүнөн мурункулардын душмандык саясатын улантып жатканын айткан. Ал Корей жарым аралындагы кырдаалдын курчушуна Вашингтон себеп болуп жатканын белгилеп, Пхеньян Кошмо Штаттардын жана анын тарапташтарынын аракеттерин айыптай турганын билдирген.

"Биз душмандын коопсуздугуна коркунуч туудурган стратегиялык деңгээлдеги аракеттерди олуттуу талкуулоону пландап жатабыз", - деген Ким Ё Чжон.

Президенттин карындашынын мындай билдирүүсүнө 2-март күнү Түштүк Кореянын Пусан шаарынын портуна америкалык Carl Vinson учак конуучу кемесинин келиши себеп болгон.

Автор: Кылымбек Бейшеев
Фото: Интернеттен алынды