Адылбек Касымалиев Вьетнамдын президенти Лыонг Кыонг менен жолугушту

Бүгүн, 6-мартта Министрлер кабинетинин төрагасы Адылбек Касымалиев Вьетнамдын президенти Лыонг Кыонг менен жолугушту. Бул туурасында президенттин администрациясынын маалымат кызматы билдирди.

Адылбек Касымалиев президент Садыр Жапаровдун атынан куттуктоо сөзүн, ошондой эле Кыргызстанга расмий визит менен келүүгө чакыруу катын тапшырды.

"Кызматташтыкты мындан ары бекемдөө үчүн жогорку деңгээлдеги саясий байланыштарды активдештирүү, өкмөттөр аралык консультацияларды үзгүлтүксүз жөнгө салуу жана расмий делегациялардын сапарлары менен алмашууга көмөктөшүү зарыл деп эсептейм", - деди ал.

Өз кезегинде Лыонг Кыонг Садыр Жапаровго саламын жолдоду. Ал эки тараптуу мамилелерди чыңдоону белгилеп, эки өлкө ортосундагы кызматташтыкты жаңы деңгээлге чыгарууга кызыкдар экендигин билдирди.

Сүйлөшүүлөрдүн жүрүшүндө тараптар ар кандай тармактарда эки тараптуу кызматташтыкты тереңдетүүнүн келечегин талкуулашты. Соода-экономикалык өз ара аракеттенүүнү, маданий-гуманитардык жана инвестициялык кызматташтыкты чыңдоо маселелерине өзгөчө көңүл бурулду.

Автор: Замира Ниязбекова