Бүгүн, 11-мартта Министрлер кабинетинин төрагасы Адылбек Касымалиев Улуу Британия жана Түндүк Ирландиянын бириккен королдугунун атайын жана ыйгарым укуктуу элчиси Николас Боулер, ошондой эле инвестициялык талаш-тартыштарды жөнгө салууда англис укугун колдонуу маселелери боюнча эл аралык консультанттар менен жолугушту. Бул туурасында президенттин администрациясынын маалымат кызматы билдирди.
Маалымдалгандай, тараптар Кыргызстандын инвестициялык жагымдуулугун өнүктүрүү, чет өлкөлүк инвестицияларды тартуу, инвесторлордун укуктарын коргоо чөйрөсүн талкуулашты.
"Өзгөчө көңүл инвестициялык жана башка коммерциялык талаш-тартыштарды чечүүгө багытталган көз карандысыз арбитраждык механизмди түзүүнүн келечегине бурулду. Бул механизм жалпы англис укугунун нормаларын, ошондой эле башка жалпы укук юрисдикцияларынын эрежелерин жана принциптерин колдонуу менен иштейт деп болжолдонууда.
Мындан тышкары, бизнес жүргүзүү жана инвестициялык долбоорлорду ишке ашыруу үчүн жагымдуу шарттарды түзө турган өзгөчө укуктук режими бар атайын инвестициялык аймакты (ИТТ) түзүү демилгеси талкууланды", - деп айтылат маалыматта.
Өз кезегинде Николас Боулер “Улуу Британия Кыргызстандын экономикасын өнүктүрүүгө жана инвестиция тартууга көмөктөшүү үчүн укук тармагындагы экспертизасы жана тажрыйбасы менен бөлүшүүгө даяр” деп белгиледи. Учурда бул долбоорлорду ийгиликтүү ишке ашыруу үчүн зарыл болгон консультациялык-методикалык колдоону каржылоо форматын аныктоо процесси аяктап жатканы белгиленди.