АКШ Кыргызстан жана Тажикстанды чек ара келишимине жетишкендиги менен куттуктады

Америка Кошмо Штаттары Кыргызстан менен Тажикстанды чек араны делимитациялоо жана демаркациялоо боюнча тарыхый келишимдин кабыл алынуусу менен куттуктады. Бул тууралууу АКШнын Мамлекеттик департаментинин басма сөз катчысы Тэмми Брюстун билдирүүсүн Кошмо Штаттардын Кыргызстандагы элчилиги жарыялады.

Брюс бул жетишкендик эки өлкөнүн өкмөттөрүнүн дипломатияга жана аймактык стабилдүүлүккө умтулуусун чагылдырарын белгилеген.

"Чек арадагы талаш-тартыштарды чечүү өкмөт аткара ала турган эң татаал дипломатиялык милдеттердин бири болуп саналат жана биз эки өлкөнүн башчыларынын тоскоолдуктарды жеңүүгө болгон көз карашын жана чечкиндүүлүгүн кубаттайбыз. Америка Кошмо Штаттары бул маанилүү келишим сооданын жана элдердин ортосундагы байланыштарды бекемдөөгө, ошондой эле эки өлкөнүн гүлдөп-өнүгүүсүнө жана тынчтыкка жол ачат деп үмүттөнөт", - деп айтылат анда.

Буга чейин Түрк тилдүү мамлекеттер уюму (ТМУ),Бириккен Улуттар Уюму (БУУ) жана Жамааттык коопсуздук келишим уюму (ЖККУ) да кыргыз-тажик чек арасы чечилгенин кубаттаган.

Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери Садыр Жапаров менен Эмомали Рахмон 13-мартта Бишкекте кол койгон.

Автор: Бек Оморбеков