Кызыл-Кыяда 32 жаштагы өзбекстандык аял кармалды

Кызыл-Кыя шаарында уурулукка шектелип 32 жаштагы өзбекстандык аял киши кармалды. Бул тууралуу бүгүн, 18-мартта Баткен облустук ички иштер башкармалыгы билдирди.

Маалыматка ылайык, ал 1-март күнү шаардагы Таштемир ажы базарынын ичиндеги кийим сатуучу дүкөндө соода кылган жарандын сумкасы менен акчасын уурдаган. Буга улай эле 15-мартта ошол эле базардагы дүкөндөрдүн биринде турган белгисиз сумканын ичиндеги капчыкты, банктык картаны жана паспортту уурдаган.

Эки факты боюнча Кылмыш-жаза кодексинин 205-беренеси (Уурулук) менен кылмыш иши козголгон. Текшерүү иштеринин жыйынтыгында жалпы материалдык чыгым 21 миң сомду түзгөн. Шектүү базар ичине коюлган видеобайкоолордун жардамы менен колго түшкөн.

Автор: Кылымбек Бейшеев
Фото: Баткен ОИИБ