Бүбүсара Бейшеналиева атындагы искусство университетине улуттук статус ыйгарылды

Бүбүсара Бейшеналиева атындагы Кыргыз мамлекеттик маданият жана искусство университетине улуттук статус ыйгарылды. Бул тууралуу аталган окуу жайдан бүгүн, 25-мартта кабарлашты.

Маалыматка ылайык, тиешелүү тескемеге президент Садыр Жапаров кол койгон.

Ага ылайык, окуу жай эми Бүбүсара Бейшеналиева атындагы Кыргыз улуттук маданият жана искусство университети деп аталат.

Маалымат үчүн: Кыргыз мамлекеттик искусство институту 1967-жылы негизделген. 1974-жылы окуу жайга белгилүү балерина, СССРдин эл артисти Бүбүсара Бейшеналиеванын аты берилген. 1993-жылы окуу жай — Б. Бейшеналиева атындагы Кыргыз мамлекеттик институту жана Кыргыз мамлекеттик консерваториясы болуп экиге бөлүнгөн.

2014-жылы Кыргыз мамлекеттик искусство институту Кыргыз мамлекеттик маданият жана искусство университети болуп өзгөртүлгөн.

Окуу жайдын ишмердүүлүгү маданият жана искусствонун мамлекеттик жана мамлекеттик эмес секторлорунда иштей турган адистерди даярдоого багытталган.

Автор: Айжанар Рыспек кызы
Фото: интернеттен алынды