Логвиненко айыл өкмөтүнүн кызмат адамдары муниципалдык жерлерди сатып жиберишкен

Чүй облусунун Ысык-Ата районунун мурдагы Логвиненко айыл өкмөтүнүн жооптуу кызмат адамдары 2023-жылы базар баасы 4 миллион 65 миң сомду түзгөн 2500 чарчы метр жер тилкесин, мыйзамсыз түрдө 1 миллион 200 миң сомго жеке менчикке сатып жиберген.

Бул туурасында Башкы прокуратура билдирди.

Маалымдалгандай, мыйзамсыз аракеттер аталган райондун прокуратурасы тарабынан жүргүзүлгөн текшерүүдө аныкталган.

Бул факт боюнча Кылмыш-жаза кодексинин 337-беренеси (кызматтык абалынан кыянаттык менен пайдалануу) менен кылмыш иши козголуп, тергелүүдө.

Ал эми аталган жер тилкени муниципалдык менчикке кайтаруу боюнча учурда тиешелүү чаралар көрүлүп жаткандыгы маалыматта кошумчаланган.

Автор: Замира Ниязбекова