Америка Лионель Мессинин жансакчысы тууралуу күтүүсүз чечим кабыл алды

Футбол боюнча Америка лигасы (MLS) мындан ары атактуу футболчу Лионель Мессинин күзөтчүсү Ясин Чеукого оюн учурунда футбол талаасына чуркап чыгууга тыюу салууну чечти. Бул тууралуу чет элдик спорт басылмалары жазышты.

Маалыматка ылайык, мындай тыюу салуу ар бир стадиондо кошумча жардамды талап кылбаган коопсуздуктун бар экендиги менен түшүндүрүлөт. Буга чейин күйөрмандар кумири менен сүрөткө түшүү үчүн талаага чуркап чыккандан кийин Мессинин жансакчысы көпчүлүктүн көңүл борборунда болгон.

"Мага мындан ары талаага чыгууга уруксат жок. Мен Европада жети жыл иштедим. Бул убакыттын ичинде талаага алты гана адам чуркап чыккан. Биз АКШга келгенден бери 20 айдын ичинде 16 жолу аракет болду.

Бул жерде чоң көйгөй бар. Мен көйгөй эмесмин, жөн гана Мессиге жардам берем. Мен эч кимден артык эмесмин, Европада тажрыйбам бар. Бирок, албетте, мен лиганын чечимин түшүнөм", - деген Мессинин жансакчысы.

Эскерте кетсек, Чеуко Ирак жана Ооганстандагы согуштук тажрыйбасы бар АКШ армиясынын атайын күчтөрүнүн мурдагы жоокери. Ал ошондой эле ММА боюнча бир нече беттештерге катышкан.

Автор: Азат Бейшенбеков