Курскта Чеченстандын "Ахмат" спецназын украиналыктар миномёт менен аткылашты

Чеченстандын "Ахмат" атайын күчтөрүнүн эвакуациялоочу тобуна Курск аймагында Украинанын куралдуу күчтөрүнүн пилотсуз учактары жана миномётторунан чабуул жасалды. Бул тууралуу атайын күчтөрдүн командири Апти Алаудинов өзүнүн Telegram каналында билдирди.

Анын айтымында, жарадар болгон жоокерди унаа менен ооруканага бара жатканда мина жарылган. Аскер кызматкерлери унааны таштап, жакынкы токойго качып киришкен. Андан кийин аларга Украинанын учкучсуз учактары чабуул жасаган.

"Согушкерлер душмандын эки FPV учкучсуз учагын ок атуучу курал менен атып түшүрүштү. Биздин жоокерлер так атып жатканын түшүнгөн душман 120 миллиметр артиллерияны жигердүү колдонду. Бирок миномёттун снаряддары бутага жеткен жок", - деп жазды ал.

"Ахматтын" атайын тобу ал жерден дагы аман-эсен чыгып, жарадарларды ооруканага жеткиришкен.

Автор: Азат Бейшенбеков