Мьянмада жер титирөөдөн беш күндөн кийин урандылардын астынан бир жигит тирүү табылды (видео)

Мьянманын борбор шаары Нейпьидодо жер титирөөдөн беш күн өткөндөн кийин бир адам мейманкананын урандыларынын астынан куткарылды. Бул тууралуу өлкөнүн өрткө каршы кызматы билдирди.

Куткаруучулар аман калган адамдын ден соолугунун абалы тууралуу так маалымат беришкен жок. Бирок таратылган видеого караганда, жигит олуттуу жаракат алган эмес.

Учурда дагы деле издөө-куткаруу иштери уланууда, бирок аман калгандарды табуу үмүтү азайып баратат.

Эске сала кетсек, 28-мартта Мьянмада күчү 7,7 баллга жеткен катуу жер титирөө болуп, өлкөнүн бүт аймагында жана коңшу мамлекеттерде кыйроолорго алып келген. Жер титирөөнүн очогу 1,5 миллион адам жашаган өлкөнүн экинчи чоң шаары Мандалайдан 17 чакырымдай алыстыкта болгон.

Жер титирөө 2700дөн ашуун адамдын өмүрүн алды. Мьянмада 31-марттан 6-апрелге чейин улуттук аза күтүү жарыяланды.