Сиднейде учакта жаңжал чыгарган иорданиялык аткаминер кармалды

Сиднейде Малайзиядан Австралияга учуп келген учакта экипаж мүчөсүнө кол салган иорданиялык аткаминер кармалды. Бул тууралуу чет элдик басылмаларда кабарланды.

Маалым болгондой, Шади Тайссер Айед Аль-Саайдех учуу учурунда AirAsia авиакомпаниясына таандык учактын авариялык чыгуу эшиктерин ачууга аракет кылган. Ошондой эле ал борт коштоочусуна кол салган. Учак конгондон кийин 46 жаштагы Иордания жараны федералдык полиция тарабынан кармалган.

Ага учактагы коопсуздукка коркунуч жаратуу жана экипажга кол салган деген айыптар тагылды.

«Иордания жаранына күрөө менен бошотууга уруксат берилген жок», — деп айтылат билдирүүдө.

ABC басылмасы жазгандай, Аль-Сааиде ядролук калдыктарды башкаруу тармагында Иорданиянын өкмөтүндө иштейт. Сиднейде ал австралиялык кесиптештери менен жолугушууну көздөгөн.

Автор: Айжанар Рыспек кызы
Фото: интернеттен алынды