Күрөш боюнча Европа чемпиондугунун финалында адаттан тыш окуя болду

Словакияда өткөн күрөш боюнча Европа чемпиондугунун 72 килограмм салмак категориясынын финалында адаттан тыш окуя болду.

Тагыраагы, Дүйнөлүк күрөш уюму (UWW) беттеште калыс ката кетиргенин моюнга алып, бул салмак категориясында эки чемпионду жарыялады.

72 килограмм салмактын финалында венгриялык Левенте Леваи менен франциялык Ибрагим Ганем кез келген. Беттеш 4:4 эсебинде аяктап, венгриялык балбан акыркы болуп упай алгандыгы үчүн жеңүүчү деп табылган. Бирок беттеш аяктагандан кийин француз балбанынын машыктыруучулары протоколдо ката бар экенин далилдөөгө аракет кылган.

Талаштуу учур үчүнчү пассив берүүдөн кийин болгон. Калыстар венгриялык балбанга өз позициясын тандоого мүмкүнчүлүк бергендин ордуна, жаңылып бир упай берип алышкан. Дал ушул 1 упай акыркы эсепке таасирин тийгизген. Калыстык туура болсо, Ибрагим Ганем 4:3 эсебинде жеңишке жетиши керек болчу.

Француз делегациясы расмий нааразылык билдирип, финалдан бир нече саат өткөндөн кийин UWW өкүлдөрү катаны моюнуна алышкан. Жыйынтыгында эки финалист – Левенте Леваи менен Ибрагим Ганем 72 килограммга чейинки салмак категориясында 2025-жылкы Европа чемпиону деп жарыяланды.

Автор: Азат Бейшенбеков