ӨКМ Ала-Букадагы сел боюнча билдирүү таратты

Өзгөчө кырдаалдар министрлиги Жалал-Абад облусуна караштуу Ала-Бука районунун Ынтымак айыл аймагынын Ак-Тайлак айылында катталган сел боюнча маалымат берди.

Билдирүүгө ылайык, бүгүн саат 15:30 чамасында Ала-Бука районунда мөндүр аралаш жамгыр жааган.

Андан улам кокту-колоттордон сел суулары түшүп, 1 турак үйдүн короосун сел суулары каптаган жана ВАЗ 2017 үлгүсүндөгү автоунааны сел агызып келип, көпүрөнүн жогору тарабына токтоп калган.

Аталган аймакка ӨКМдин Ала-Бука райондук өзгөчө кырдаалдар бөлүмүнөн ыкчам топ жана райондук Жарандык коргонуу кызматтары тартылып, тактоо жумуштары жүрүүдө жана абал көзөмөлгө алынууда.

Кошумча маалымат берилет.

Автор: Айжанар Рыспек кызы