Быйыл 1-класска бара турган балдардын саны айтылды

2025-2026-окуу жылында Кыргызстандын мектептерине 170 миңден ашуун бала биринчи класска барат. Бул тууралуу билим берүү жана илим министри Догдуркүл Кендирбаева бүгүн, 17-апрелде Жогорку Кеңештин жыйынында билдирди.

Министрдин маалыматына караганда, бул балдардын басымдуу бөлүгү мектепке чейинки даярдыктан өткөн:

120 миңге жакын бала - нөлүнчү класстарда билим алышкан;
40 миң бала - "Наристе" программасынын алкагында бала бакчаларда даярдалган;
3 миңден ашык бала - жеке менчик бакчаларда жана мектептерде окутулган;
3500дөй бала - мектепке даярдыкты мектептен тышкаркы мекемелерде көрүшкөн.

"Бирок 821 бала мектепке чейинки даярдоодон өткөн эмес. Бул балдар үчүн 2025-жылдын август айында атайын мектепке даярдоо курстары уюштурулат", - деди министр

Автор: Жазгүл Жаңыбаева