Зеленский Путинге ок атышууну токтотуунун жаңы форматын сунуштады

Украинанын президенти Владимир Зеленский Москвага 30 күн бою жарандык инфраструктурага узак аралыкка учуучу учкучсуз учактар менен ракеталык соккуларды жасоодон баш тартууну сунуштады. Бул тууралуу Зеленский 20-апрель күнү кечинде өзүнүн Telegram каналына жазды.

Билдирүүсүндө Зеленский орус армиясы бир күндө Пасха элдешүү келишимин эки миңден ашык жолу бузганын билдирди.

"Буга чейин биздин позицияларга Орусия тарабынан 67 жолу чабуул жасалды. Чындыгында, фронттун бардык негизги багыттары боюнча Орусия ок атышпоо келишимин аткарган жок. Орусия биздин Пасхага карата 30 күн бою толук ок атышпоо сунушубузга жооп бербей койду", - деп жазды Зеленский.

Ошол эле учурда Зеленский жекшемби күнү Украинада аба чабуулунун сиреналары бир да жолу жаңырбаганын белгиледи.

"Демек, бул жетишилген жана улантуу эң оңой болгон унчукпоо форматы. Украина узартуу мүмкүнчүлүгү менен 30 күндөн кем эмес мөөнөткө жарандык инфраструктурага узак аралыкка учуучу учкучсуз учактар жана ракеталар менен сокку уруудан баш тартууну сунуштайт.

Эгер Орусия мындай кадамга макул болбосо, бул анын мындан ары да элдин жашоосун кыйраткан жана согушту улантуучу гана иштерди жасоону каалап жатканынын далили болот", - деп жазды украин президенти.

Орус президенти Владимир Путин жарыялаган Пасха майрамы 21-апрелде Москва убактысы боюнча саат 00:00дө (Бишкек убактысы боюнча 03:00) аяктады. Орус лидеринин басма сөз катчысы Дмитрий Песков 20-апрель күнү кечинде Путин ок атышпоону узартуу боюнча буйрук бербегенин билдирди.

Буга чейин Москва менен Киев бири-бирин Пасха майрамын бузду деп айыпташкан.

Автор: Азат Бейшенбеков