"Амантай менен Айтуяк" анимациялык тасмасынын авторлору билим берүүнүн өкүлдөрү менен жолугушту

Кечээ, 29-апрелде мектепке чейинки курактагы балдар үчүн даярдалган "Амантай менен Айтуяк" аттуу жаңы анимациялык тасманын автору жана режиссёру Айбек Дайырбеков, ошондой эле сценарийдин автору Токтобек Үсөнов билим берүү тармагынын өкүлдөрү менен жолугушту. Бул тууралуу Билим берүү министринин басма сөз кызматы билдирди.

Маалымдалгандай, жолугушууда мультфильмдин 12 сериясына карата кыскача мазмундары сунушталып, алар боюнча пикирлер жана сунуштар айтылды.

Анимациялык сериалдын сценарийинде төмөнкү баалуулуктар чагылдырылган:

Адамдагы асыл сапаттарды калыптандыруу,
айлана-чөйрөгө камкор мамиле жасоо,
китеп окууга жана билим алууга кызыктыруу,
өзүн-өзү өнүктүрүүгө үндөө,
бири-бирин колдоого үйрөтүү.

Бул мазмундук линиялар тажрыйбалуу тарбиячылар жана мектепке чейинки билим берүү тармагынын эксперттери менен биргеликте иштелип чыккандыгы маалыматта кошумчаланган.

Автор: Жазгүл Жаңыбаева
Фото: Билим берүү жана илим министрлиги