УКМК Лебединовканын мурдагы айыл өкмөт башчысын кармады

Чүй облусунун Аламүдүн районундагы Лебединовка айыл аймагынын мурдагы башчысы кызматтык абалынан кыянаттык менен пайдаланып, көптөгөн жер тилкелерин мыйзамсыз ээлеп алганы аныкталды. Бул тууралуу 1-майда УКМК кабарлады.

"Жалпы аянты 23 гектардан ашуун жер тилкелерин мамлекеттик баланска кайтарып берди. Тергөөнүн жүрүшүндө аныкталгандай, Ч.Б.А. 1992-2012-жылдар аралыгында Чүй облусунун Аламүдүн районундагы Лебединовка айылынын башчысы кызматын ээлеп, кызматтык абалынан кыянаттык менен пайдаланып, Чүйдүн Аламүдүн районунун, Ысык-Көл облусунун Ысык-Көл районунун жана Бишкек шаарынын аймагында жайгашкан көп сандаган жер тилкелерин мыйзамсыз ээлеп алгандыгы аныкталган.

Ыкчам-иликтөө иш-чараларынын натыйжасында жогоруда аталган жер тилкелери мамлекеттин балансына кайтарылды. Учурда жер тилкелерин жеке менчикке мыйзамсыз берүү фактыларын аныктоо боюнча тиешелүү иш-чаралар жүргүзүлүүдө", - деп билдиришти УКМКдан.

Автор: Азат Бейшенбеков