Вокзалдагы жык-жыйма эл: Бишкектеги автобустар аймактарга каттамга чыкты

Нарын жана Ысык-Көл облустарына жүргүнчүлөрдүн агымы көбөйгөнүнө байланыштуу Бишкек шаардык мэриясы коомдук транспортторду аймактарга жөнөттү.

Май айындагы майрам жана дем алыш күндөрүнө байланыштуу борбордон аймактарга кеткен жүргүнчүлөрдүн агымы көбөйгөн. Алсак, 30-апрелде эле "Бишкекавтобекети" муниципалдык ишканасынан 3500дөн ашык адам өлкөнүн түндүк аймактарына – Нарын жана Ысык-Көл облустарына жөнөп кетишкен.

Мэрия аймактар аралык каттамдарды тейлеген кичи автобустар жеке ташуучулар экенин жана жүргүнчүлөрдүн аздыгынан алар Бишкекке кайтып келбей жатканын билдирди. Жол кирени жасалма жол менен көтөрүү аракеттери да катталган. Буга байланыштуу 1-май күнү автобекетте транспорттун тартыштыгы жаралган.

"Бишкек мэриясы тарабынан бул маселени чечүү боюнча ыкчам чаралар көрүлүп, Бишкек-Балыкчы каттамы боюнча 10 автобус жөнөтүлдү. Андан соң Балыкчы шаарынан жүргүнчүлөр кичи автобустар менен Ысык-Көл облусунун түндүк жана түштүк аймактарына ташылып жатат", - деп айтылат мэриянын билдирүүсүндө.

Автор: Азат Бейшенбеков