Айжан Чаначева "Дүйнө сулуусу" сынагына катышуу үчүн Индияга жөнөп кетти

"Кыргызстан сулуусу-2025" наамынын ээси Айжан Чаначева 72-эл аралык "Дүйнө сулуусу-2025" сынагына катышуу үчүн Индияга жөнөп кетти. Бул тууралуу 6-майда "Кыргызстан сулуусу" улуттук сулуулар сынагынын дирекциясы кабарлады.

Айта кетсек, "Дүйнө сулуусу-2025" сынагы 7-майдан 1-июнга чейин Индиянын Хайдарабад шаарында өтөт. Сынакка 132 өлкөдөн барган сулуулар катышышат.

"Дүйнө сулуусу" сынагы сырткы сулуулукту гана эмес, акыл-эсти, боорукерликти жана коомдо оң өзгөрүүлөрдү жасоого умтулууну да даңазалоочу уникалдуу платформа болуп эсептелет. Айжандын 31-майда өтө турган финалдык баскычтагы катышуусу көптөрдү шыктандырып, өлкөбүздүн эл аралык деңгээлдеги кадыр-баркын арттырарына ишенебиз. Анын жолу ийгиликтерге толсун, ал эми тарыхы кийинки муундар үчүн үлгү болсун", - деп жазылат анда.

Белгилей кетсек, "Дүйнө сулуусу" сынагы Индияда экинчи жыл катары менен өтүп жатат. Былтыркы сынак Мумбай шаарында өткөн.

Автор: Айжанар Рыспек кызы