Кыргызстанга Сауд Арабиядан ишкерлер делегациясы келди

Министрлер кабинетинин төрагасы Адылбек Касымалиев өлкөгө жумуш сапары менен келген Сауд Арабиянын Соода-өнөр жай палаталар федерациясынын башкармалыгынын төрагасы Хасан Моажеб Аль-Хувайзи баштаган делегацияны кабыл алды. Бул тууралуу өкмөттүн басма сөз кызматы билдирди.

Анда Касымалиев делегациянын иш сапары кыргыз ишкерлери менен жакындан таанышууга, өз ара пайдалуу келишимдерге жетишүүгө өбөлгө болоруна ишеним артарын билдирди.

“Делегацияңыздын курамына көрүнүктүү, алдыңкы ишканалардын жетекчилери кириптир. Сиз жетектеп келген Сауд Арабиясынын ишкерлер делегациясынын сапары кыргыз-сауд мамилелеринин мындан ары өнүгүшүнө олуттуу түрткү берет деп ишенем. Эки мамлекеттин ортосундагы кызматташтыкта кыргыз-сауд ишкерлер кеңешинин ролу дагы абдан маанилүү”, – деди Касымалиев.

Өз кезегинде Хасан Моажеб Аль-Хувайзи Кыргызстан менен Сауд Арабиянын ортосундагы эки тараптуу кызматташтык мындан ары да өнүгө берерине жана өз ара кызыкчылык жараткан бардык тармактар боюнча тереңден иш алынып барыларына ишенерин билдирди.

Маалым болгондой, эки мамлекеттин ортосундагы соода жүгүртүүнүн көлөмү 2024-жылга карата 2,83 миллион долларды түзгөн.

Автор: Айжанар Рыспек кызы
Фото: министрлер кабинети