ТИМ Түркияда кармалган кыргыз мугалиминин иши боюнча маалымат берди

Түркияда кармалган кыргызстандык мугалим Азамат Нурмат уулунун иши боюнча биринчи соттук кароо күтүлүүдө. Бул тууралуу Тышкы иштер министрлигине байланышканыбызда билдирди.

Маалыматка ылайык, 9-майда ал Газиантеп провинциясынын сотунун чечимине ылайык, тергөө абагынан бошотулуп, үй камагына чыгарылган болчу.

"Азыркы учурда биринчи соттук кароо күтүлүүдө. Кыргызстандын Стамбул шаарындагы Башкы консулдугу Азамат Нурмат уулу менен туруктуу байланышта болууда. Бул маселе Тышкы иштер министрлигинин өзгөчө көзөмөлүндө", - деп билдирди мекемеден.

Айта кетсек, ушул жылдын апрель айында “Маариф” (мурдагы “Сапат”) эл аралык билим берүү мекемесинин Ысык-Көлдөгү Кусеин Карасаев балдар лицейинин математика мугалими Азамат Нурмат уулу Түркияга кеткен бойдон дайынсыз болуп жатканы кабарланган. Андан соң Стамбул аэропортунан чек арачылар тарабынан кармалганы айтылган.

Кыргызстандын Тышкы иштер министрлиги бул боюнча иш алып барылып жаткандыгын расмий билдирген. Ошондой эле Түркиянын Кыргызстандагы элчилигине вербалдык нота тапшыргандыгын маалымдаган.

Автор: Айжанар Рыспек кызы
Фото: Интернеттен алынды