III Бишкек эл аралык кинофестивалынын расмий жабылуу аземи өттү

Кечээ, 15-июнда Бишкек шаарынын Абдылас Малдыбаев атындагы опера жана балет театрында III Бишкек эл аралык кинофестивалынын расмий жабылуу аземи өттү. Бул тууралуу Маданият, маалымат жана жаштар саясаты министрлиги билдирди.

Маалыматка ылайык, азем мэриянын камералык оркестринин концерти менен ачылды. Андан кийин экрандан фестивалдын расмий интросу жана бир нече күнгө созулган иш-чаранын жүрүшүн чагылдырган видео-ролик көрсөтүлдү.

Иш-чаранын жүрүшүндө үч сынактын - эл аралык, Борбор Азия жана KyrgyzBox багытындагы тасмалардын жеңүүчүлөрүнүн ысымы аталып, байгелер тапшырылды.

Калыстар тобу тасмаларды режиссёрлук, актёрдук чеберчилик, көркөмдүк жана визуалдык дизайн сыяктуу критерийлер боюнча баалашты. Эл аралык сынактын мыкты тасмасына сыйлыкты Маданият, маалымат жана жаштар саясаты министри Мирбек Мамбеталиев тапшырды.

Эл аралык сынактын жеңүүчүлөрү:

Мыкты оператордук иш - "Качкын", Болсунбек Таалайбек уулу;
Мыкты актёрдук иш - "Водитель города тишины", Тувшинбаяр Амартувшин;
Мыкты режиссёр - Сэнгэдорж Жанчивдорж, "Водитель города тишины";
Гран-при, мыкты фильм үчүн - "Крик тишины", Те Мо Наинг.

KyrgyzBox сынагынын жеңүүчүлөрү:

Мыкты фильм - "Ашыгым", Руслан Акун, Азиза Кхалбекова, Манас Калдаров;
Мыкты режиссура - "Өч", Илгиз Куватбек жана Шамилбек Бекбосун уулу;
Мыкты актёрдук иш - "Аяш 4", Динара Багышбаева;
Мыкты оператордук иш - "Күрөш", Нурбек Мамбетисаев.

Борбор Азия сынагынын жеңүүчүлөрү:

Гран-при, мыкты фильм үчүн - "Мерген", KyrgyzFilm студиясы, CityLab Production, Чыңгыз Нарынов
Мыкты режиссура -"Joqtau", Аруан Анартай;
Мыкты актёрдук иш - "Авель", Ерлан Толеутай;
Мыкты сценарий - "От", Дастан Мадалбеков жана Айзада Бекбалаева.