Иранда куралдуу жаңжалда каза болгондордун тажиясы башталды

Бүгүн, 28-июнда Иранда Израил жана АКШ менен болгон куралдуу жаңжалда каза тапкан аскер башчылардын, өзөктүк илимпоздор менен жай тургундардын тажиясы башталды.

Тажия аземи Тегерандын Революция аянтында башталып, ага Ирандын жаңы шайланган президенти Масуд Пезешкиан катышууда.

Tasnim агенттигинин маалыматына ылайык, Израилдин аскерлери Иран куралдуу күчтөрүнүн Генштабынын жетекчиси Мохаммад Багерини жана Ислам революциясынын сакчылар корпусунун башчысы Хосейн Саламини, ошондой эле 20дан ашык өзөктүк физикти жана жогорку аскер жетекчилерин жок кылган.

Ирандын Саламаттыкты сактоо министрлигинин өкүлү Хосейн Керманпурдун билдиришинче, Израил жана АКШ менен болгон 12 күндүк куралдуу кагылышууда жалпы 627 адам каза болуп, 4870 адам жаракат алган.

Эске салсак, 13-июнда Израил Ирандын өзөктүк жана аскердик объекттерине сокку урган. Иран буга жооп кылып Израилге абадан сокку жасаган.

22-июнга караган түнү АКШ президенти Дональд Трамп Ирандагы үч өзөктүк объектке америкалык аба күчтөрү сокку урганын билдирип, уран байытуучу негизги объекттер "толугу менен жок кылынганын" айткан.

24-июнда Трамп Иран менен Израил ок атышууну токтотуу режимине макулдашканын жарыялаган.

Автор: Ширин Марат кызы