Испанияда баасы бир бөлмөлүү батирге тете сыр сатылды

Испанияда сыр боюнча дүйнөлүк жаңы рекорд коюлду. UPI агенттигинин маалыматына караганда, аукциондо Cabrales аттуу сыр 42 миң долларга сатылып, тарыхтагы эң кымбат сыр деп табылды.

Cabrales — Астурия регионунда өндүрүлгөн белгилүү көгүш сыр. Аукциондо сатылган 2,27 килограммдык бул деликатес Анхель Диас Эрреронун сыр жасоочу жайында жасалган. Ал үчүн уй сүтү колдонулуп, бышыруу процесси 10 айга созулган. Сыр Астуриядагы деңиз деңгээлинен 1500 метр бийиктиктеги Лос-Масос тоо үңкүрүндө бышырылган.

Аукционго чейин сыр DOP Cabrales сынагында «Мыкты сыр» номинациясын жеңип, ага болгон кызыгууну дагы да арттырган.

Аукциондун жеңүүчүсү Испаниядагы белгилүү El Llagar de Colloto рестораны болду. Алардын айтымында, бул уникалдуу сыр жакын арада алардын менюсунда пайда болот жана меймандар бул деликатестин даамын тата алышат.