Денис Петрашов Германияда өтүп жаткан Дүйнөлүк Жайкы Универсиадада алтын тагынды

Кыргызстандык сууда сүзүүчү Денис Петрашов Германияда өтүп жаткан Дүйнөлүк Жайкы Универсиадада алтын медаль утуп алды. Бул тууралуу мелдештин расмий сайтында кабарланды.

Алгачкы жарышта 100 метрлик брасс ыкмасы боюнча Петрашов 1 мүнөт 0,63 секунд жыйынтык көрсөтүп, жалпы протоколдо 3-орунду ээлеп, жарым финалга чыкты. Жарым финалда кыргызстандык спортчу 1 мүнөт 0,27 секунд убакыт менен 5-орунду ээледи.

Ал эми финалдык сүзүүдө 59,32 секунд жыйынтык көрсөтүп, 1-орунду ээледи. Белгилей кетсек, бул аралыкка жалпысынан 56 спортчу катталган.

Жайкы Универсиада 16–27-июль күндөрү Рейн-Рур шаарында өтүүдө. Бул мелдешке Кыргызстандын курама командасы сүзүү, таэквондо, дзюдо, жеңил атлетика жана стол тенниси боюнча катышууда.