Нарында 19 жаштагы жигит таанышынан акча опузалоого шектелип кармалды (видео)

Нарын шаарында ири суммадагы акча опузалоо шектелип 19 жаштагы жигит кармалды. Бул тууралуу Нарын облустук ички иштер башкармалыгы билдирди.

Маалыматка ылайык, 10-июлда милицияга шаар тургуну арыз менен кайрылган. Ал таанышы 2023-жылдын декабрь айынан бери коркутуп-үркүтүү жолу менен акча талап кылып келгенин айткан.

Текшерүүнүн жүрүшүндө арыз ээси 2023–2024-жылдары шектүүгө жалпы 770 миң 669 сомду накталай жана банк аркылуу бергендиги аныкталган. Таанышы быйыл июль айында да андан 3,5 миллион сом талап кылган.

Шектүү кечээ, 21-июлда арыздануучудан 50 миң сом алып жаткан жеринен кармалып, убактылуу кармоочу жайга киргизилген. Факт боюнча Кылмыш-жаза кодексинин 208-беренеси (Опузалап акча талап кылуу) менен кылмыш иши козголду.

Учурда тергөө иштери уланууда.