Маданият министрлигинин кызматкерлерине планшеттер тапшырылды

Маданият, маалымат жана жаштар саясаты министри Мирбек Мамбеталиев санариптик өзгөрүү алкагында жана кызматкерлердин мобилдүүлүгүн жогорулатуу максатында министрликтин кызматкерлерине 20 планшет тапшырды. Бул тууралуу кечээ, 30-июлда аталган министрликтен билдиришти.

Бул техникалар көчмө, координациялык жана аналитикалык иштерге тартылган бөлүм башчыларына берилди. Планшеттер кызматкерлерге талаа шартында маалымат алмашууга, отчётторду даярдоого жана иш-чараларды координациялоого мүмкүнчүлүк берет. Ошондой эле алар кызматтык милдеттерди аткарууда заманбап санариптик куралдарды пайдаланууга шарт түзөт.

Мирбек Мамбеталиев: “Бул жөн эле техника эмес, мамлекеттик башкарууну ийкемдүү, ачык жана ыкчам кылуучу шайман. Биз санариптештирүү жана процесстерди модернизациялоо багытын улантабыз”,- деп билдирди.

Министрлик өз ишмердүүлүгүндө заманбап технологияларды киргизүүнү этап-этабы менен улантат. Анын ичинде кызматкерлерди керектүү байланыш жана иш куралдары менен камсыздоо да каралган.