Кыргызстанда майыптыгы бар адамдар үчүн жеке ассистенттердин саны көбөйтүлдү

1-июлга карата майыптыгы бар адамдарга кызмат көрсөткөн жеке ассистенттердин саны 14 906 адамга жетип, аларга 793 миллион сомдон ашуун каражат төлөндү. Бул тууралуу бүгүн, 31-июлда Эмгек министрлиги билдирди.

Маалым болгондой, майыптыгы бар адамдардын жалпы саны 15 225ти түздү. Анын ичинен 9582си 18 жашка чейинки балдар, 5643ү чоң адамдар.

"Төлөмдөрдүн жана жеке ассистенттердин санынын өсүшү - майыптыгы бар адамдарды колдоо жана камкордук менен камсыз кылуу багытында мамлекеттин аракеттеринин жыйынтыгы",- деп белгилешти министрликтен.

Өткөн жылы 1-июлга карата 14 537 жеке ассистенттерге – 635 миллион сом которулган. Ал кезде майыптыгы бар адамдардын саны 14 848 болгон.

Автор: Замира Ниязбекова