Кыргызстандык ишкер мэрди Прага шаарына чакырды (видео)

Ош шаарынын мэри Жеңишбек Токторбаевди Чехиянын борбору Прага шаарында жашап, эмгектенип жаткан кыргыз жараны, ишкер Айбек Молдокадыров иш сапары менен Прагага келип кетүүсүн суранды. Бул тууралуу бүгүн, 5-августта Ош шаарынын мэриясы билдирди.

Ал мэрди Прагадагы унаа тыгынын жоюу, тазалык маселелери менен күрөшүүдөгү санариптик ыкмаларды, тажрыйбаларды көрүп, Ош шаарында да ишке ашыруу сунушун айткан.

"Бул сыяктуу шаар мэринин жасап жаткан жумуштарын жана шаар инфраструктурасын жакшыртуу, унаа тыгындарын жоюу аракетине колдоо катары бир катар чет элдеги жана Кыргызстандагы мекендештер сунуш, демилгелер менен чыгышып, мэрди колдоого даяр экендиктерин билдирип келишет",-деп айтылат маалыматта.