Жалал-Абаддагы "экс-бандиттер" кылмыш дүйнөсүнөн баш тартышты

Жалал-Абад облусунда “Бандит” аталышында иш-чара өткөрүлдү. Бул тууралуу бүгүн, 15-августта облустук милициянын басма сөз кызматы билдирип, УКМКнын, Жалал-Абад ОИИБинин, ИИМдин Атайын багыттагы полкунун кызматкерлери тарабынан жүргүзүлгөндүгү белгилүү болду.

Иш-чаранын жүрүшүндө уюшкан кылмыштуу топтун мүчөсү катары каттоодо турган жалпы 47 жаран аныкталып, 13ү милицияга жеткирилди. Алардын манжа издери алынып, түшүндүрүү иштери жүргүзүлдү.

Ошондой эле УКМК тарабынан Сузак районунун 2003-жылы туулган М.С. жана К. уулу С. аттуу 2 тургуну кармалып, Кылмыш-жаза кодексинин 261-беренеси (Уюшкан топту түзүү же ага катышуу) 2-пункту менен камакка алынды.

Жыйынтыгында каттоодо турган 13 уюшкан кылмыштуу топтун мүчөлөрү кылмыш дүйнөсүнүн идеологиясынан баш тартып, мыйзам талаптарын сактоого милдеттенме алышты.

Автор: Замира Ниязбекова