Президент текшергенден кийин көл жээгиндеги таштанды тазаланды

Ысык-Көл ОИИБинин туристтик-экологиялык милиция кызматы президент Садыр Жапаров тарабынан текшерүүдөн өткөн жана таштандылар аныкталган көлдүн жээгинде тазалоо иштерин жүргүздү.

Мекеме билдиргендей, аталган пляж Чолпон-Ата шаарына караштуу Бактуу-Долоноту айылындагы ипподромдун аймагында жайгашкан.

"13-август күнү туристтик-экологиялык милиция кызматкерлери күнүмдүк текшерүү иштерин жүргүзүү учурунда бул аймактан таштандыларды аныктап, сүрөткө тартып, Чолпон-Ата шаардык мэриясына билдирүү беришкен. Мэрия тарабынан таштандыларды ыкчам тазалоо боюнча убада берилгенине карабастан, аймак тазаланбай калган. Мындан улам милиция кызматкерлери кечээ пляждын жээгин тазалап чыгышты",- деп билдирди милициядан.

Айта кетсек, 17-августта президент Садыр Жапаров социалдык тармактагы баракчасы аркылуу Ысык-Көлдүн жээгин жөө кыдырып, таштандылар көп экендигин билдирген.