Мирзиёев: "Өзбекстанга жыл башынан бери 700 миңден ашуун эмгек мигранты кайтып келди"

Өзбекстандын президенти Шавкат Мирзиёев жыл башынан бери 700 миңден ашуун жаран чет өлкөлөрдөн кайтып келгенин билдирди. Бул тууралуу чет элдик басылмалар жазышты.

"Эң маанилүүсү – быйыл эле чет жакта иштеп жүргөн 700 миң мекендешибиз жүргүзүлүп жаткан реформалардын натыйжалуулугуна ишенип, өлкөгө, үй-бүлөлөрүнө кайтып келишти",- деди Мирзиёев.

Өзбек лидери мигранттардын массалык кайтып келиши экономикалык реформалардын, жаңы жумуш орундардын көбөйүшүнүн жана ишкердик чөйрөнүн жакшырышынан улам болгонун кошумчалады.

Мирзиёев белгилегендей, жыл башынан бери болжол менен 5 миллион адам жумуш менен камсыздалды.

"Өлкө калкы жыл сайын 700-800 миң адамга өсүүдө, жана эмгек рыногуна 500-600 миң жаш жаран кошулуп жатат. Бул шартта мамлекет туура уюштурулган систем, кепилденген инвестициялар жана инфраструктура менен камсыз болууга тийиш",- деп билдирди Мирзиёев.

Автор: Ширин Марат кызы