Ала-Бука районундагы маданий жайлар жаңыланууда

Жогорку Кеңештин төрагасы Нурланбек Тургунбек уулу жана маданият, маалымат жана жаштар саясаты министринин биринчи орун басары Союзбек Надырбеков иш сапарынын алкагында Ала-Бука районунда болушту. Бул тууралуу аталган министрликтен билдирди.

Алгач алар Ш.Жоробекова атындагы Маданият үйүндө жүргүзүлгөн оңдоп-түзөө иштеринин абалы менен таанышты. Аталган мекеме 4,5 миллион сомдон ашуун каражатка реконструкцияланды.

Ошондой эле төрага жана министрдин биринчи орун басары Сафед-Булан айылындагы Шах-Фазиль мамлекеттик тарыхый-маданий корук музейинин дирекциясынын жаңы административдик имаратынын ачылыш аземине катышты.

Имараттын курулушу 2023-жылы башталып, ага жалпысынан 27 миллион сом каражат бөлүнгөн. Сапардын алкагында Шах-Фазиль эстелиги менен да таанышып, анын архитектуралык жана көркөмдүк өзгөчөлүктөрү өткөн доордун өрнөктүү мисалы гана эмес, ыйык жайлардын бири экендиги белгиленди. Зыярат кылуу учурунда күмбөздө куран окулду.

Автор: Айсулуу Урустамова